Statutas
Ils 31 da schaner 2016 ei l’Uniun Archiv cultural Sumvitg UACS vegnida fundada.
Culla radunonza da fundaziun ein las statutas passadas en vigur e la suprastonza ha
scochemai priu en mira la realisaziun d’in Archiv cultural per la vischnaunca
da Sumvitg.
La fuorma per persunas en quellas statutas ei masculina e representa mintgamai
omisduas schlatteinas.
I. Num, domicil, intent
art. 1 Num e domicil
Cul num Uniun Archiv cultural Sumvitg (UACS) exista in’uniun el senn digl artechel 60 e
suandonts dil Cudisch civil svizzer che ha siu domicil el liug dil president.
art. 2 Intent
Igl intent dall’Uniun Archiv cultural Sumvitg (el suandont numnada uniun) ei la promoziun
e conservaziun dalla cultura dalla vischnaunca da Sumvitg, specialmein ils secturs agricultura, alpegiaziun, architectura, archeologia, art, artisanadi, baselgia, cant, film, fotografia, historia,
hobis, litteratura, lungatg, mistregn, musica, uniuns, turissem e.a.v..
Quellas finamiras dueien vegnir contonschidas entras in archiv cultural cun in extendiu sistem d’informaziun e cun agid da persunas indigenas e d’ordeifer, sco era d’instituziuns e quei cun:
a) rimnar, inventarisar, digitalisar, archivar e conservar material cultural e da documentaziun
da tut gener;
b) archivar e conservar relaschs da tut gener;
c) realisar ina pagina d’internet sco plattafuorma d’informaziun;
d) dar sclariment a bucca ed a scret;
e) metter a disposiziun documents digl archiv per studi a tiarzas persunas;
f) sustener l’instrucziun sur da nossa cultura en ed ordeifer la scola;
g) organisar exposiziuns ed auters arranschaments;
h) promover activitads culturalas en general;
i) edir ovras d’informaziun e publicaziuns sur da temas specials;
j) realisar in museum communal;
k) far part da reits regiunalas e surregiunalas dad archivs culturals;
l) ulteriuras incumbensas tenor decisiun dall’uniun.
Per ademplir questas finamiras s’engaschan en emprema lingia ils commembers dall’uniun.
L’uniun sa era engaschar persunas dil fatg cun incumbensas specialas.
II. Commembradi
art. 3 Commembers
L’uniun consista da:
a) persunas naturalas;
b) persunas giuridicas da dretg privat e public;
c) organisaziuns cun intent cultural.
art. 4 Recepziun ed extrada
Ils commembers vegnan recepi dalla suprastonza. Entradas succedan cun s’annunziar a bucca ni a scret tier la suprastonza dall’uniun. Extradas ein da far a scret mintgamai per la fin digl onn calendaric cun annunziar alla suprastonza sil pli tard la fin november.
art. 5 Dretgs ed obligaziuns
Mintga commember gauda tut ils avantatgs dall’uniun. El ha il dretg da votar e da far
propostas. La recepziun oblighescha il commember da renconuscher las statutas sco
era tuttas decisiuns pridas legalmein dalla radunonza generala ni dalla suprastonza.
Mintga commember ei tenor sias pusseivladads e tenor necessitad obligaus da collaborar
a caschun d’occurrenzas dall’uniun. Ils commembers s’engaschan pils interess dall’uniun
tenor art. 2.
art. 6 Contribuziun annuala
La contribuziun annuala dils commembers vegn mintgamai fixada dalla radunonza generala.
art. 7 Fauturs
Fauturs sustegnan las finamiras dall’uniun. Els vegnan informai sur dallas activitads
dall’uniun. Els san era s’engaschar tier projects dall’uniun.
III. Organisaziun
art. 8 Organisaziun
Ils organs dall’uniun ein:
d) la radunonza generala;
e) la suprastonza;
f) ils revisurs da quen.
art. 9 La radunonza generala
La radunonza generala ei il suprem organ dall’uniun. Ella vegn tenida ina gada ad onn e
vegn convocada sil pli tard 30 dis avon la radunonza cun invitaziun a scret e publicaziun
dallas tractandas. La radunonza generala vegn tgamunada dil president. Scadina radunonza
generala ch’ei vegnida convocada conform allas statutas ei legitimada da decider. Mintga
commember ha ina vusch.
Alla radunonza generala cumpetan:
a) approbaziun dil protocol dalla davosa radunonza;
b) approbaziun dil rapport annual;
c) approbaziun dil rendaquen e dil rapport dils revisurs;
d) dar scarica alla suprastonza;
e) approbaziun dil preventiv;
f) fixaziun dallas contribuziuns annualas;
g) elecziun dil president, dil vicepresident/actuar, dil cassier, dils assessurs e dils
revisurs da quen
h) tractaziun dil program da lavur annual;
i) tractaziun da propostas;
j) midadas da statutas;
k) dissoluziun dall’uniun.
Alla radunonza generala eisi prudent da cumbinar referats, discussiuns, investas,
excursiuns ni autras activitads che stattan en connex cugl intent dall’uniun.
art. 10 Radunonzas extraordinarias
Radunonzas extraordinarias san vegnir convocadas da tut temps entras la suprastonza.
Ina radunonza extraordinaria sto vegnir convocada sche silmeins 20 % dils commembers
pretendan quei a scret.
art. 11 Propostas
Propostas da pli gronda muntada san ils commembers inoltrar entochen sil pli tard 5 dis
avon la radunonza generala a scret alla suprastonza. Cass cuntrari vegnan ellas buca
tractandadas dalla radunonza generala.
art. 12 Modus da votar
Votaziuns ed elecziuns vegnan fatgas cun maun pli. Ei vala mintgamai il pli relativ dallas
vuschs presentas. La suprastonza ni era in singul commember san pretender scrutini. Tier
votaziuns dat il president la vusch da tagl, tier elecziuns decida la sort.
art. 13 Suprastonza
La suprastonza consista da treis tochen sis commembers:
a) president;
b) vicepresident/actuar;
c) cassier;
d) tochen treis assessurs.
Il gerau che representa ils fatgs da cultura en vischnaunca da Sumvitg ei ex. officio
commember dalla suprastonza. Tenor pusseivladad dueien las fracziuns da Sumvitg,
Rabius, Surrein e Cumpadials esser representadas ella suprastonza. Il temps d’uffeci
cuoza treis onns. Reelecziun ei pusseivla. La suprastonza tgamuna l’uniun. Ella representa quella anoviars e pren tuttas mesiras per ademplir las finamiras dall’uniun. La suprastonza serimna silmeins quater gadas ad onn. La suprastonza ei habla da decider sche silmeins treis commembers ein presents. Tier votaziuns dat il president la vusch da tagl, Tier elecziuns decida la sort. La suttascripziun valeivla anoviars ha il president ensemen cul vicepresident. Per fatschentas ordinarias currentas segna il president ni in suprastont per regla persuls. La suprastonza dispona ordeifer il preventiv annualmein dad ina summa da total frs. 10’000.
art. 14 Pensums dalla suprastonza
Las incumbensas dalla suprastonza ein:
a) procurar per la realisaziun dallas finamiras tenor art. 2;
b) menar igl archiv cultural;
c) preparar il program da lavur annual e coordinar quel;
d) relaschar directivas;
e) representaziun dils interess dall’uniun anoviars;
f) diever dils mieds finanzials en rama dil preventiv;
g) administraziun dalla facultad dall’uniun;
h) prender si novs commembers;
i) preparaziun dil rapport annual e dil rendaquen per mauns dalla radunonza generala;
j) lavur d’informaziun pils commembers ed anoviars;
k) eleger cumissiuns e definir ils plans da lavur da quellas;
l) incaricar singulas persunas cun pensums specials per l’uniun;
m) fixar indemnisaziuns;
n) promover e tgirar contacts cun auters archivs culturals;
o) ulteriurs pensums tenor decisiun dalla radunonza generala.
art. 15 Ils revisurs da quen
Ils dus revisurs da quen vegnan eligi dalla radunonza generala per ina perioda da treis
onns. Reelecziun ei pusseivla. Ils revisurs controlleschan il quen. Sur dalla revisiun
rapporteschan els a scret cun proposta alla suprastonza per mauns dalla radunonza
generala.
art. 16 Informaziuns
L’uniun informescha regularmein ils commembers e la publicitad cun ina broschura ni
entras sia pagina d’internet.
IV. Finanzas
art. 17 Onn da gestiun
Igl onn da quen ei identics cugl onn calendaric. Il quen annual ei da serrar giu culs 31 da
december. Il rapport annual, il quen annual ed il rapport dils revisurs ein da tarmetter
sil pli tard diesch dis avon la radunonza generala a mintga commember.
art. 18 Finanzas
Las entradas dall’uniun secumponan da:
a) contribuziuns dils commembers;
b) contribuziuns da fauturs;
c) donaziuns;
d) contribuziuns dalla vischnaunca e d’instituziuns publicas;
e) contribuziuns d’organisaziuns;
f) recavs d’arranschaments dall’uniun (p.ex. contribuziuns per survetschs dall’uniun);
g) recavs da tscheins.
art. 19 Responsabladad
Per eventualas obligaziuns dall’uniun astga mo la facultad da quella vegnir constrenschida.
Ina responsabladad persunala ei sclaussa.
V. Disposiziuns finalas
art. 20 Revisiun dallas statutas
Las statutas vertentas san vegnir revedidas da tut temps entras la radunonza generala cun duas tiarzas dallas vuschs.
art. 21 Dissoluziun
La dissoluziun dall’uniun sa mo la radunonza generala decider e quei cun silmeins duas
tiarzas dils presents cun dretg da votar. Tier ina dissoluziun vegn la facultad avon maun
surdada alla vischnaunca da Sumvitg en favur dalla nova uniun che seconstituescha culs
medems interess sco l’uniun dissolvida. Seconstituescha ina tala buc enteifer diesch onns,
croda la facultad alla vischnaunca da Sumvitg per diever liber.
art. 22 Approbaziun e vigur
Quellas statutas ein vegnidas approbadas dalla radunonza da fundaziun
dils 31 da schaner 2016 ed ein immediat passadas en vigur.
Surrein, ils 31 da schaner 2016
Il president: Walter Deplazes
Il vicepresident/actuar: Tarcisi Hendry